Bu gün Polis Günüdür və ona görə də gün ərzində AzVision.az tanınmışların Azərbaycan Polisi haqqında fikirlərini sizə təqdim edəcək.

Öncə millət vəkili və tanınmış teleaparıcı, siyasi şərhçi Sahib Alıyevin Azərbaycan polisi haqqında fikirlərini təqdim edirik.

Ölkəmiz Avropa Şurasına üzv olduqdan sonra qanunvericiliyə edilən çoxlu sayda dəyişikliklər bir tərəfdən aşırı hərəkətlərin qarşısını alsa da, etiraf etməliyik ki, digər tərəfdən Azərbaycanda hüquq-mühafizə orqanlarının, xüsusilə də polisin işini xeyli çətinləşdirdi. Onlar birdən-birə illərdir adət etdikləri yox, fərqli generasiya üçün nəzərdə tutulmuş fərqli standartlarla işləməli oldular.

Amma Azərbaycan polisi bu sınağın öhdəsindən uğurla gəldi. İşğal altındakı torpaqlarımızı çıxmaqla indi Azərbaycanın elə bir nöqtəsi yoxdur ki, ya bu ölkənin vətəndaşları, ya da əcnəbilər günün istənilən vaxtında çəkinmədən, sərbəst gəzib- dolana bilməsinlər. Dünyanın barmaqla sayıla biləcək qədər az ölkəsində rast gəlinən bu rahatlığı ilk növbədə Azərbaycan polisi təmin edir.

Bəlkə həmin kadrları siz də görmüsünüz, 2003-cü ilin oktyabrında əllərində daş-kəsək küçələrdə azğınlıq edən radikalların ayağının altında tapdanaraq ürəyi gedən balaca bir körpəni o xaosun içində heç nəyə məhəl qoymadan bir nəfər xilas etməyə çalışırdı və xilas etdi də. O, Daxili İşlər Nazirliyinin xüsusi təyinatlısı idi. `Azərbaycan polisi` deyəndə gözümün önünə bax, həmin kadrlar gəlir.

Bilirsiniz, məncə, polisin uğurlarının kökündə ilk növbədə onların rəhbərliyinin dövlət və dövlətçiliyə sədaqətləri, peşəkarlıqları və təvazökarlıqları durur. Xatırlatmaq istəyirəm ki, hazırda ölkənin daha iki güc nazirliyinin başçısı da vaxtilə Daxili İşlər orqanlarında çalışmış adamlardır və fikrimcə, bu, heç də təsadüfi deyil. Mən cənab Ramil Usubov başda olmaqla Daxili İşlər Nazirliyinin bütün əməkdaşlarını təbrik edir, işlərində uğurlar arzulayıram!

AzVision.az